ठाणे, 09:- विधानसभा सार्वत्रिक निवडणुकीच्या अनुषंगाने मतदानात सहभाग वाढविण्यासाठी नियोजनबद्ध मतदार शिक्षण आणि निवडणूक सहभाग (SVEEP) कार्यक्रमाच्या माध्यमातून स्वीप (SVEEP) अंतर्गत मतदार, मतदान जनजागृती करण्याबाबतच्या कार्यवाहीचा आढावा घेण्यासाठी तसेच दिव्यांग मतदारांसाठी सोयीसुविधा, मतदार नॉंदणी इत्यादीबाबत चर्चा करण्यासाठी उप जिल्हा निवडणूक अधिकारी श्रीमती वैशाली माने यांच्या अध्यक्षतेखाली जिल्हास्तरीय समितीची बैठक जिल्हा नियोजन समिती सभागृह येथे काल, दि.7 ऑक्टोबर 2024 रोजी स्वीप (SVEEP) कक्षाची आढावा बैठक संपन्न झाली.
या बैठकीत नवी मुंबई महानगरपालिकेचे उपायुक्त भागवत डोईफोडे, कल्याण डोंबिविली महानगरपालिकेचे उपायुक्त संजय जाधव, कामगार उपायुक्त प्रदीप पवार, समाज कल्याण विभागाचे सहाय्यक आयुक्त समाधान इंगळे, भिवंडी महानगरपालिकेचे अतिरिक्त आयुक्त विठ्ठल डाके, ठाणे जिल्हा परिषदेच्या शिक्षणाधिकारी प्राथमिक/माध्यमिक श्रीमती ललिता दहीतुले, ठाणे जिल्हा परिषदेचे जिल्हा समाज कल्याण अधिकारी संजय बागूल, ठाणे जिल्हा परिषदेचे कार्यकारी अभियंता बांधकाम संदीप चव्हाण, ठाणे सिटीझन फाऊंडेशनचे कॅस्बर ऑगस्टीन समाजसेवक आणि विविध संघटनांचे प्रतिनिधी उपस्थित होते.
या बैठकीत मतदान जागरूकता वाढविण्यासाठी चर्चा केली गेली. तसेच ग्रामीण भागातील मतदार जागरूकता वाढविण्याची आवश्यकता आहे, अनेक ग्रामीण नागरिक निवडणूक प्रक्रियेबद्दल अनभिज्ञ आहेत, म्हणून त्यांच्यासाठी विशेष कार्यशाळा आणि माहिती सत्र आयोजित करण्याची गरज आहे, अपंग मतदारांना अडचणींचा सामना करावा लागतो, त्यामुळे दिव्यांगांसाठीही मतदान जनजागृती मोहीम आवश्यक आहे, ठाण्यातील विविध निवासी सोसायट्यांमध्ये मतदान जागृतीकरिता बैठकांचे आयोजन करण्यात यावे, असे विचार यावेळी मांडण्यात आले.
या बैठकीत स्थानिक रहिवाशांना मतदारयादी, मतदान याविषयी त्यांच्या समस्या थेट व्यक्त करण्याची संधी देण्याचा प्रस्ताव मांडण्यात आला. मतदार यादीत आपले नाव कसे तपासावे याबद्दलही माहिती दिली गेली. अधिकाऱ्यांनी निवडणूक कामकाजाविषयी ऑनलाईन ॲप्सचा उपयोग कसा करावा, याबद्दल मार्गदर्शन करण्यात आले.
उप जिल्हा निवडणूक अधिकारी श्रीमती वैशाली माने यांनी यावेळी सूचना देताना सांगितले की, या समितीने मतदार नोंदणी व निवडणूकीच्या वेळी प्रत्यक्ष मतदानाची टक्केवारी वाढविण्यासाठी मतदार जननागृती कार्यक्रम आयोजित करावेत. सर्व महानगरपालिका व नगरपरिषद यांच्याकरिता नेमण्यात आलेले स्वीप नोडल अधिकारी तसेच ग्रामीण भागासाठी गटविकास अधिकारी यांच्यामार्फत मतदार जनजागृती कृती आराखडा तयार करून त्यानुसार अंमलबजावणी होत असल्याची खात्री करावी.
आगामी निवडणुकांमध्ये मतदानाच्या टक्केवारीत वाढ होण्याच्या दृष्टीने आवश्यक उपक्रम राबविण्याकरिता जिल्हाधिकारी तथा जिल्हा निवडणूक अधिकारी अशोक शिनगारे यांच्या अध्यक्षतेखाली जिल्हास्तरीय स्वीप समिती गठीत करण्यात आली आहे.
ही समिती पुढीलप्रमाणे:-
सदस्य तथा स्वीप नोडल अधिकारी महानगरपालिका क्षेत्र:- अतिरिक्त आयुक्त (ठाणे, कल्याण-डोंबिवली आणि भिवंडी निजामपूर महानगरपालिका), उपायुक्त (निवडणूक) (नवी मुंबई, उल्हासनगर आणि मिरा भाईंदर महानगरपालिका)
सदस्य:- कामगार उपायुक्त ठाणे, जिल्हा उप निबंधक सहकारी संस्था ठाणे, सहाय्यक आयुक्त समाजकल्याण ठाणे, गटविकास अधिकारी (शहापूर, मुरबाड, भिवंडी, कल्याण), शिक्षणाधिकारी (माध्यमिक) ठाणे जिल्हा परिषद, ठाणे जिल्हा महिला व बालविकास अधिकारी, जिल्हा समाजकल्याण अधिकारी, ठाणे जिल्हा परिषद, प्रकल्प अधिकारी, एकात्मिक आदिवासी विकास प्रकल्प शहापूर, ठाणे, प्रादेशिक अधिकारी महाराष्ट्र औद्योगिक विकास महामंडळ महापे व ठाणे, जिल्हा माहिती अधिकारी, ठाणे.
विशेष निमंत्रित:- श्री.अशोक भोईर, District PWD Icon (दिव्यांग), श्री.कॅस्बर ऑगस्टीन, निता केणे (किन्नर अस्मिता संस्था), श्री.भावेश मारू (ठाणे लघुउद्योग), बांदोडकर महाविद्यालयाचे एनसीसी मार्गदर्शक श्री.बिपीन धुमाळे.
सदस्य सचिव तथा जिल्हा स्वीप समन्वय अधिकारी, ठाणे:- तहसिलदार ठाणे-1, मुंबई महानगर प्रदेश, झोपडपट्टी पुनर्वसन प्राधिकारी, ठाणे.
Monday, December 22 2025 5:43 pm
