ताफ्यातील अम्ब्युलन्समधील डॉक्टरच्या मदतीने तरुणाच्या हातावर केले उपचार
मुख्यमंत्र्यांच्या संवेदनशील स्वभावाचा पुन्हा एकदा आला अनुभव
मुंबई, 02 :- सध्या सगळीकडे दिवाळीचा उत्साह तर दुसरीकडे विधानसभा निवडणुकीची धामधूम सुरू आहे. अशावेळी प्रत्येक नेता आपापली गणिते जुळवण्यात व्यस्त असताना मुख्यमंत्री एकनाथ शिंदे हे मात्र आपला मदतीचा हात कायम पुढे करण्यात जराही कसूर ठेवत नाहीत, याचाच पुन्हा एकदा प्रत्यय आला.
परवा रात्री वर्षा बंगल्यावरील नियोजित बैठका आटोपून रात्री उशिरा ठाण्याकडे निघाले असता बिकेसी येथील ब्रिजवर त्यांना एक बाईकस्वार जखमी अवस्थेत पडून असल्याचे निदर्शनास आले. तत्काळ मुख्यमंत्र्यांनी आपला ताफा थांबवून या तरुणाची विचारपूस केली. रस्त्यावर अचानक अपघात झाल्याने त्याच्या हाताला दुखापत झाल्याचे त्याना कळले. त्यानंतर तत्काळ त्यांनी आपल्या ताफ्यातील अम्ब्युलन्स मधील डॉक्टराना बोलावून या तरुणांच्या हातावर उपचार करायला सांगितले. तसेच त्याची विचारपूस करून तो ठीक असल्याची खात्री पटल्यानंतरच ते ठाण्याला निघाले.
असे पहिल्यांदाच नव्हे तर अनेकदा घडले आहे जेव्हा आपला बडेजावपणा बाजूला ठेवून रस्त्यावरील अपघातग्रस्ताच्या मदतीला मुख्यमंत्री एकनाथ शिंदे धावून गेले आहेत. सध्या निवडणुकीचे पडघम वाजू लागले आहेत आणि मॅरेथॉन बैठकांची सत्र रात्री उशिरा पर्यंत सुरू असली तरीही मुख्यमंत्र्यांच्या मनातील माणूस कायम जागा असतो हेच त्यांच्या या कृतीमधून पुन्हा एकदा दिसून आले.
