मुंबई, 11: पुणे जिल्ह्यातील मावळ तालुक्यात इंद्रायणी विद्या मंदिर, तळेगाव दाभाडे या संस्थेस
एकूण १५ एकर जागा शासनाकडून देण्यात आली आहे. या संस्थेने शासनाने प्रदान केलेल्या जमिनीवर मंजूर नकाशानुसार बांधकाम न करता अनधिकृत बांधकाम केल्याचे आढळल्यास तात्काळ कारवाई केली जाईल, असे आश्वासन महसूल मंत्री चंद्रशेखर बावनकुळे यांनी विधानसभेत सांगितले.
यासंदर्भात विधानसभा सदस्य सुनील शेळके यांनी विधानसभेत लक्षवेधी सूचना मांडली होती.
महसूल मंत्री श्री. बावनकुळे म्हणाले, संबंधित संस्थेने एकूण ९ इमारतींचे बांधकाम केले असून त्यापैकी ५ इमारती नियोजन प्राधिकरणाच्या परवानगीशिवाय बांधल्या आहेत. तसेच, संस्थेने शासनाने प्रदान केलेली जमीन बँकेत तारण ठेवून ५८ कोटी ९० लाखांचे कर्ज घेतले आहे. या संदर्भात महाराष्ट्र प्रादेशिक नियोजन व नगर रचना अधिनियमानुसार कारवाई सुरू आहे. अनधिकृत बांधकामाप्रकरणी गुन्हा दाखल करण्यात आला आहे.
अजूनही मंजूर नकाशाबाहेरचे बांधकाम सुरू असेल तर त्याला तात्काळ स्थगिती देण्यात येईल, असेही महसूल मंत्री श्री. बावनकुळे यांनी सांगितले. या लक्षवेधी सूचनेमध्ये सदस्य छगन भुजबळ, नाना पटोले यांनी सहभाग घेतला.
