Wednesday, January 20 2021 12:58 am

सीरम इन्स्टिट्यूटमधून कोविशिल्डचे ३ कंटेनर रवाना

मुंबई : सीरमने तयार केलेल्या कोविशिल्ड लसीचे ३ कंटेनर आज कंपनीतून पहाटे ४.५० वाजता लोहगाव विमानतळाकडे रवाना झाले आहेत. कंपनीच्या मांजरी कार्यालयातून लोहगाव विमानतळापर्यंत विशेष पोलीस बंदोबस्तात हे कंटेनर रवाना झाले. कंपनीच्या वरिष्ठ अधिकाऱ्यांनी कंटेनरची पूजा केल्यानंतर या कोल्ड चेन व्हॅन लोहगाव विमानतळाकडे रवाना झाल्या.

आज देशात एकूण १३ ठिकाणी ८ विविध विमानांमधून कोविशिल्ड लसीची वाहतूक केली जाणार आहे. पहिलं विमान सकाळी दिल्लीला रवाना झालं. पहिल्या टप्प्यात या लसीचा वापर हा प्रामुख्याने कोरोना वॉरियर्ससाठी करण्यात येणार आहे. कंपनीला सुरुवातीला दोन कोटी डॉसची ऑर्डर मिळाली आहे.

वाहतुकीसाठी विशेष प्रकारच्या कोल्ड चेन व्हॅन वापरण्यात आल्या आहेत. ही लस दोन ते आठ अंश सेल्सिअस इतक्या तापमानात ठेवणे आवश्यक असल्याने या वाहनांमधून तितके तापमान नियंत्रित करण्यात आले आहे.

पुणे विमानतळावरून कोव्हिशिल्ड लस देशभरातील १३ शहरांमध्ये पाठविण्यात येणार आहेत. यामध्ये औरंगाबाद, दिल्ली, चेन्नई, बंगळूर, कर्नाल, कोलकत्ता, विजयवाडा हैदराबाद, गुवाहाटी, लखनऊ, चंदीगड आणि भुवनेश्वर या शहरांचा समावेश आहे.

पुणे विमानतळावरून पहिले विमान दिल्लीसाठी सकाळी ८ वाजता रवाना होणार आहे. ८ फ्लाईटपैकी २ फ्लाईट कारगो असून यातील कारगो फ्लाईट पैकी एक हैदराबाद, विजयवाडा आणि भुवनेश्वर, तर दुसरी कोलकता आणि गुवाहाटी येथे जाणार आहे.