Thursday, January 24 2019 6:22 pm

सपा-बसपाच्या आघाडीची घोषणा

लखनौ-: बसपा अध्यक्षा मायावती यांनी भाजपवर हल्लाबोल केला आहे. या पत्रकार परिषदेत मायावती यांनी सपा आणि बसपाच्या आघाडीची घोषणा केली आहे. उत्तर प्रदेशच्या एकूण 80 लोकसभा जागांपैकी सपा आणि बसपा प्रत्येकी 38 जागांवर लढणार आहेत. या आघाडीत काँग्रेसचा समावेश नसला तरीही अमेठी आणि रायबरेलीची जागा काँग्रेसला देण्यात आली आहे. तर दोन जागा इतर लहान मित्रपक्षांसाठी ठेवण्यात आल्या आहेत.सपाचे अखिलेश यादव आणि मायावती हे लोकसभा निवडणुकीत आघाडी करणार आहेत. याबाबत दोघांनी पत्रकार परिषद घेत घोषणा केली.

दिल्लीची सत्ता आपल्या हाती करण्याच्या दृष्टीने उत्तरप्रदेश हे राज्य सर्वाधिक महत्त्वाचं मानलं जातं. याच राज्यात आता पारंपारिक राजकीय विरोधक सपा आणि बसपा यांची आघाडी आता निश्चित झाली आहे. मागील लोकसभा निवडणुकीत भाजपला उत्तर प्रदेशातील 80 पैकी 73 जागा मिळाल्या होत्या. सपा आणि बसपा या दोन पक्षांमध्ये झालेल्या मतविभागणीचा मोठा फायदा भाजपला झाला होता. पण आता हे दोन पक्ष एकत्र येत आहेत. त्यामुळे उत्तर प्रदेशसारख्या महत्त्वाच्या राज्यात भाजपला फटका बसण्याची शक्यता आहे. ही आघाडी करत असताना या दोघांनीही काँग्रेसला बाजुला सारण्याचा निर्णय घेतला. मात्र अमेठी आणि रायबरेली या दोन जागांवर ते उमेदवार उभे करणार नाहीत. काही दिवसांपूर्वी दिल्लीत बसपाच्या अध्यक्षा मायावती आणि सपाचे नेते अखिलेश यादव यांनी तब्बल तीन तास मॅरेथॉन बैठक घेतली.