Friday, February 14 2025 7:42 pm

विशेष संक्षिप्त पुनरीक्षण कार्यक्रमांतर्गत विशेष मतदार नोंदणी मोहीम

ठाणे, 07 :- मा. भारत निवडणूक आयोगाकडील दि.२९ मे २०२३ रोजीच्या निर्देशानुसार राज्यातील सर्व विधानसभा मतदारसंघात दि. ०१ जानेवारी, २०२४ या अर्हता दिनांकावर आधारीत छायाचित्रासह मतदार
यादीच्या विशेष संक्षिप्त पुनरिक्षण कार्यक्रम सुरु आहे.
या कार्यक्रमामध्ये मा. भारत निवडणूक आयोगाने दि.२५ सप्टेंबर, २०२३ व मा. मुख्य निवडणूक अधिकारी, महाराष्ट्र राज्य यांनी दि.२६ सप्टेंबर, २०२३ रोजीच्या पत्रान्वये कळविल्याप्रमाणे सुधारीत कार्यक्रमाची अंमलबजावणी नियोजित वेळापत्रकाप्रमाणे ठाणे जिल्ह्यातील १८ विधानसभा मतदारसंघात करण्यात येत आहे. निवडणुका न्याय्य व पारदर्शक वातावरणात पार पाडण्यासाठी मतदारयाद्यांचे अद्यावतीकरण अत्यंत महत्वपूर्ण असते. त्यानुषंगाने, सुधारीत कार्यक्रमाच्या वेळापत्रकानुसार दि.०९ डिसेंबर, २०२३ पर्यत दावे व हरकती स्विकारण्यात येणार आहेत. या कालावधीमध्ये मतदारांनी आपले नाव मतदारयादीत आहे की नाही याची तपासणी करावयाची आहे. तसेच आपल्या कुटूंबातील व्यक्तींच्या नावाची नोंद मतदारयादीत नसल्यास विहित नमुन्यातील नमुना नंबर ६, ज्या मतदारांच्या नावात / पत्त्यात दुरूस्ती असल्यास नमुना नंबर ८ तसेच कुटुंबातील एखादी व्यक्ती मयत / कायमस्वरुपी स्थलांतरीत असल्यास नमुना नंबर ७ भरावयाचा आहे.
तरी नमूद कालावधीत ठाणे जिल्ह्यातील युवा मतदार, महिला मतदार, तृतीयपंथी मतदार, दिव्यांग मतदार, विशेषतः असंरक्षित आदिवासी गट (Particularly Vulnerable Trible Groups-PVTGs) तसेच बेघर अशा सर्व मतदारांनी जास्तीत जास्त मतदार नोंदणी करावी आणि मतदारयादीतील नोंदीबाबत काही आक्षेप असल्यास हरकती नोंदवाव्यात, असे आवाहन ठाणे जिल्हाधिकारी व जिल्हा निवडणूक अधिकारी श्री.अशोक शिनगारे व ठाणे उपजिल्हा निवडणूक अधिकारी अर्चना कदम यांनी केले आहे.