आमदार प्रताप सरनाईक यांच्या पाठपुराव्याला यश
ठाणे, 10 – मा. मुख्यमंत्री श्री. एकनाथ शिंदे साहेब यांच्या अध्यक्षतेखाली विधानभवनामध्ये ओवळा-माजिवडा विधानसभा मतदारसंघातील विविध विकास कामांसंदर्भात आज एक बैठक पार पडली. त्यामध्ये ठाणे महानगरपालिका क्षेत्रामध्ये हावरे सिटी जवळील नॅशनल पार्कचा एरिया सोडून वनखात्याच्या १५० एकर जमिनीवर मुंबईतील भायखळा येथील जिजामाता उद्यानाच्या धर्तीवर उद्यान करण्याची विनंती आमदार श्री. प्रताप सरनाईक यांनी केली असता मा. मुख्यमंत्र्यांनी त्यास मान्यता देऊन वनखात्याच्या प्रधान सचिव व उपस्थित अधिकार्यांना त्यावर ताबडतोब कार्यवाही करण्याचे आदेश दिले.
ठाणे शहराची लोकसंख्या झपाट्याने वाढत आहे. आजुबाजूच्या शहरामध्ये इमारतीचे बांधकाम वाढत चालले आहे. ठाण्यातील नागरिक हिरव्यागार उद्यानाकडे आकर्षित असल्यामुळे अश्या प्रकारचे उद्यान निर्मिती केल्यास आजूबाजूच्या महापालिका क्षेत्रातील अबाल वृध्दांना या उद्यानाचा फायदा होईल. काही महिन्यांपूर्वी ठाणे महानगरपालिका हद्दीमध्ये कोलशेत भागात नमो उद्यान सुरू करण्यात आले असून या उद्यानाचा आनंद घेण्यासाठी तरूण-तरूणी, अबाल-वृध्द येत असतात. त्याचप्रमाणे हावरे सिटी येथे प्राणीसंग्रहालय व उद्यान झाल्यास त्याचा आंनद शाळकरी मुलांना व अबालवृध्द तसेच नागरिकांना मिळू शकतो.
त्यानुसार या १५० एकर जागेवर बाबूंच्या झाडांबरोबरच इतरही झाडांची लागवड होणार आहे. तसेच विविध प्रकारचे प्राणी व पक्षी सुध्दा या उद्यानामध्ये उपलब्ध होणार आहेत. वनखात्याच्या नियमानुसार या ठिकाणी कुठल्याही प्रकारचे बांधकाम न करता फक्त प्राण्यांच्या सुरक्षिततेच्या दृष्टीने जेवढे बांधकाम करता येईल तेवढेच बांधकाम अनुज्ञेय करता येईल. त्यापैकी बहुतांश बांधकाम हे लाकडाचे असावे असाही अभिप्राय वनखात्याच्या अधिकार्यांनी दिला.
मुंबईतील राणीची बाग तसेच नागपूरची महाराज बाग त्याचप्रमाणे ठाणे महानगरपालिकेतही अश्या प्रकारचे उद्यान लवकरच साकारण्यात येणार आहे, असे आमदार श्री. प्रताप सरनाईक यांनी सांगितले.
या बैठकीला मा. मुख्यमंत्र्यांचे प्रधान सचिव श्री. विकास खार्गे, अतिरिक्त प्रधान सचिव श्री. आय.एस. चहल, नगरविकास खात्याचे प्रधान सचिव श्री. असीम गुप्ता, ठाणे महानगरपालिका आयुक्त श्री. सौरभ राव, सचिव जलसंपदा श्री. संजय बेलभरे, श्री. जतून कपोले, श्री. उदय ढगे, श्री. क्लेंमेंट बेन, श्री. जी. मल्लिकार्जुन, श्री. दिपक खांबीत, श्री. उदय मराठे, श्री. अनिल अंकलगी, श्री. अजित कवडे, श्री. विनोद पवार, श्री. संजय कदम, श्री. अतुल कुलकर्णी, श्री. पी.एम. शिंदे हे अधिकारी उपस्थित होते.
