मुंबई 15 :- ‘केंद्रस्तरिय अधिकारी आपल्या दारी’ हा उपक्रम १७१- मानखुर्द-शिवाजीनगर विधानसभा मतदारसंघात राबविण्यात येत आहे. यामध्ये नुकतेच झालेल्या कार्यक्रमात दसऱ्याच्या पूर्वसंध्येला ‘स्वीप’ अंतर्गत या संकल्पनेतून दसऱ्याचे औचित्य साधून शिवाजीनगर येथील स्थानिक नागरिक व मतदारांना आपट्याच्या पानांवर नैतिक मतदानाचा संदेश देण्यात आला.
आपले मत अमूल्य आहे….
दसऱ्याच्या दिवशी सोनं लुटण्याची परंपरा आहे.. त्या निमित्ताने आपट्याच्या पानांवर ‘आपले मत सोन्यासारखे अमूल्य आहे, त्याचे मोल करू नका.. मतदान नक्की करा’, ‘आपण खास आहात आणि आपले मतही’ असे संदेश असणारे सोनं म्हणजेच आपट्याची पाने लुटण्यात आली.
मुंबई उपनगर जिल्हाधिकारी तथा अतिरिक्त जिल्हा निवडणूक अधिकारी श्री. राजेंद्र क्षीरसागर यांच्या व १७१- मानखुर्द- शिवाजीनगर विधानसभा मतदारसंघाचे मतदार नोंदणी अधिकारी श्री सुदाम परदेशी यांच्या मार्गदर्शनाखाली स्वीप पथकाच्या समन्वय अधिकारी मनिषा पंडित व अन्य सहकारी यांनी हा उपक्रम प्रभावीपणे राबविला व उपस्थित नागरिकांना मतदान करण्याचे आवाहन केले.
