Friday, February 14 2025 7:41 pm

मतदार नोंदणीसाठी शाळा व महाविद्यालयातील विद्यार्थ्यांचे प्राध्यापकांनी प्रबोधन करावे

ठाणे, 24 :- ०१ जानेवारी, २०२४ या अर्हता दिनांकावर आधारित छायाचित्रासह मतदार यादीचा विशेष संक्षिप्त पुनरीक्षण कार्यक्रमाची अंमलबजावणी जिल्ह्यात सुरू आहे. यानुसार दि.१ जानेवारी, दि. १ एप्रिल, दि. १ जुलै आणि दि. १ ऑक्टोबर, २०२३ रोजी ज्या नागरिकांचे वय वर्षे अठरा पूर्ण असेल त्यांना दि. १७ ऑक्टोबर, २०२३ ते दि. ३० नोव्हेंबर, २०२३ या विशेष मोहिमेंतर्गत आगाऊ मतदार नोंदणी करता येणार आहे. या शाळा, महाविद्यालयातील जास्तीत जास्त विद्यार्थी-विद्यार्थिंनीनी मतदार नोंदणी करावी, यासाठी मुख्याध्यापक, प्राध्यापकांनी प्रबोधन करून या मोहिमेस सहकार्य करावे, असे आवाहन जिल्हाधिकारी तथा जिल्हा निवडणूक अधिकारी अशोक शिनगारे आणि उपजिल्हा निवडणूक अधिकारी अर्चना कदम यांनी केले आहे.

निवडणुका न्याय व पारदर्शक वातावरणात पार पाडण्यासाठी मतदार याद्यांचे अद्यावतीकरण अत्यंत महत्वपूर्ण असते. त्यामुळे ०१ जानेवारी, २०२४ या अर्हता दिनांकावर आधारित छायाचित्रासह मतदार यादीचा विशेष संक्षिप्त पुनरीक्षण कार्यक्रमाची अंमलबजावणी नियोजित वेळापत्रकाप्रमाणे होणार आहे. दि. १७ ऑक्टोबर, २०२३ रोजी मुख्य निवडणूक अधिकारी कार्यालयाच्या संकेतस्थळावर आणि मतदार नोंदणी कार्यालयांमध्ये प्रारूप मतदार यादी प्रकाशित केली जाईल. शाळा / महाविद्यालयातील संभाव्य मतदारांची मतदार नोंदणी होणार असल्याने १७ वर्षावरील व १८ वर्षे पूर्ण झालेल्या युवक / युवतींची जास्तीत जास्त मतदार नोंदणी होणे आवश्यक आहे. यासाठी राष्ट्रीय सेवा योजना, राष्ट्रीय छात्र सेना, नेहरू युवा केंद्र संघटना, भारत स्काऊट यांच्या सहकार्याने शाळा व महाविद्यालयांमधील मुख्याध्यापक व प्राध्यापकानी मतदार नोंदणीसाठी युवक व युवतींचे प्रबोधन करावे. त्याद्वारे जास्तीत जास्त युवा मतदारांची नोंदणी करण्यासाठी सहकार्य करावे, असे आवाहन जिल्हाधिकारी तथा जिल्हा निवडणूक अधिकारी अशोक शिनगारे आणि उप जिल्हा निवडणूक अधिकारी तथा उपजिल्हाधिकारी (निवडणूक) अर्चना कदम यांनी केले आह