Friday, November 22 2019 8:54 am
ताजी बातमी

परस्पर संमतीचे संबंध बलात्कार नाही – ठाणे कोर्टाचा निकाल

ठाणे :- परस्पर सहमतीने केलेल्या शारीरिक संबंधाला बलात्कार म्हणता येणार नाही. अशी टिप्पणी ठाण्यातील एका न्यायालयानं केली आहे. न्यायालयानं  ड्रायव्हरच्या पत्नीवर बलात्कार केल्याचा आरोप असलेल्या  व्यक्तीची सुटका करण्याचे आदेश दिले आहेत.  अतिरिक्त सत्र न्यायाधीश आर. आर. वैष्णव यांनी या खटल्याचा निकाल देताना आरोपी दिलीप श्रीधर पाटील यांची सुटका करण्याचे आदेश दिले.   ”महिलेचा पती हा आरोपी पाटील यांचा ड्रायव्हर म्हणून काम करत होता. आरोपी नेहमीच त्यांच्या घरी ये-जा करत असे. त्यामुळं त्यांची ओळख झाली होती आणि त्यातूनच हे प्रेमसंबंध निर्माण झाले होते. २०१४मध्ये आरोपीने पीडितेला एका लॉजवर बोलावून तिच्यावर बालात्कार केला. त्यानंतर अनेक ठिकाणी नेऊन बलात्कार केला. महिलेनं विरोध केल्यानंतर आरोपीनं तिची बदनामी करण्याची आणि पतीला नोकरीवरून काढून टाकण्याची धमकी दिल्याचा आरोपही करण्यात आला होता.” २०१४मध्ये महिलेच्या पतीच्या निधनानंतर आरोपीनं अनेकदा बलात्कार केला आणि तिला पैसेही दिले. या प्रकारानं त्रस्त झालेल्या महिलेनं अखेर एक दिवस पोलीस ठाण्यात तक्रार केली होती, अशी माहिती वकिलांनी न्यायालयात दिली होती.  आरोपीविरोधात कोणतीही कारवाई होऊ नये असे महिलेनं जबाबात म्हटल्याचे न्यायालयाच्या निदर्शनास आले. तसंच बचाव पक्षाच्या वकिलांनी तिच्याकडे चौकशी केली असता आरोपी आणि तिच्यामध्ये परस्पर संमतीनं संबंध ठेवण्यात आले होते, अशी कबुलीही तिने दिली. तिच्या भावजयीलाही या संबंधांबाबत माहीत झाले होते, त्यानंतर तिने पाटीलविरोधात पोलिसांत तक्रार केली होती. पीडितेच्या कबुलीनंतर आरोपीविरुद्ध आरोप सिद्ध करण्यास सरकारी वकील अपयशी ठरल्याचं कोर्टानं निकाल देताना नमूद केलं. त्यामुळं परस्पर सहमतीनं ठेवलेले शारीरिक संबंध हा बलात्कार म्हणता येणार नाही, अशी टिप्पणी न्यायालयानं केली आणि आरोपीची सुटका करण्याचे आदेश दिले.