Tuesday, July 23 2019 10:16 am

दुष्काळमुक्तीच्या प्रयत्नांना निसर्गाची साथ लाभू दे!;विठ्ठलाला मुख्यमंत्र्यांचं साकडं

पंढरपूर :- आषाढी एकादशीच्या निमित्तानं आज पहाटे पंढरपुरातील विठ्ठल मंदिरात मुख्यमंत्र्यांनी आपल्या पत्नी अमृता फडणवीस यांच्या सह श्री विठ्ठल-रुख्मिणीची शासकीय महापूजा केली.  यावेळी ‘राज्य सरकारच्या दुष्काळमुक्तीच्या प्रयत्नांना निसर्गाची साथ लाभू दे! बळीराजाला तुझा आशीर्वाद मिळू दे आणि माझा महाराष्ट्राला सुजलाम्, सुफलाम् व संपन्न होऊ दे…’ असं देवेंद्र फडणवीस यांनी पंढरपूरच्या विठ्ठलाला  साकडं घातले आहे.   मुख्यमंत्र्यांसोबत लातूर जिल्ह्याच्या अहमदपूर तालुक्यातील सांगवी सुनेवाडी तांडा या गावचे वारकरी विठ्ठल चव्हाण व प्रयाग चव्हाण या दाम्पत्याला पूजेचा मान मिळाला. सुमारे दीड तास मंत्रोच्चारांच्या साक्षीनं हा पूजा विधी पार पडला.
महापूजा संपन्न झाल्यानंतर पंढरपूर विठ्ठल मंदिर समिती व मराठा समाजाच्या वतीने  मुख्यमंत्र्यांचा सत्कार करण्यात आला. महाराष्ट्राच्या जनतेच्या मनातील आशा-आकांक्षा पूर्ण कर, असं साकडं आपण विठ्ठलाला घातल्याचं मुख्यमंत्र्यांनी यावेळी सांगितलं. मराठा समाजाच्या आरक्षण आंदोलनाच्या पार्श्वभूमीवर मुख्यमंत्र्यांना मागील आषाढी एकादशीला पंढरपूरला येता आलं नव्हतं. याची आठवणही मुख्यमंत्र्यांनी दिली. तेव्हा विठ्ठलाचाच तसा आदेश होता. तो आदेश मानून ‘वर्षा’ बंगल्यावरच पूजा केली. आताही त्याच्याच आशीर्वादानंच पंढरपुरात आलो. त्याच्या आशीर्वादानं चांगलं काम करू शकलो. लोकांच्या अपेक्षा पूर्ण करू शकलो, असं ते म्हणाले. मराठा समाजानं केलेल्या सत्काराबद्दलही त्यांनी आभार मानले. ‘खरंतर या सत्काराची गरज नव्हती. राज्यकर्ता म्हणून मी माझं कर्तव्य केलं. जनभावनेचा आदर राखून मराठा समाजाला आरक्षण दिलं. ते करताना इतर समाजावर अन्याय होऊ दिला नाही,’ असं ते म्हणाले. ‘विठ्ठलरूपी जनतेची पाच वर्षे पूजा करण्याची संधी मिळणं हे माझं भाग्य आहे. ती संधी पुन्हा मिळेल,’ अशी अपेक्षाही त्यांनी यावेळी व्यक्त केली.