• जपानी कंपन्यांकडील तंत्रज्ञान सहाय्याबाबत झाली चर्चा
ठाणे 12 : जपान सरकारचे प्रतिनिधित्व करणाऱ्या नोमूरा रिसर्च इन्स्टिट्यूट या संस्थेच्या प्रतिनिधींनी शुक्रवारी ठाणे स्मार्ट सिटी लिमिटेडच्या कार्यालयास भेट देऊन प्रकल्पांची माहिती घेतली. विविध प्रकल्पांच्या अंमलबजावणी मध्ये येणारी आव्हाने आणि त्यांचा सामना करण्यासाठी जपानी कंपन्यांकडे असलेले तांत्रिक सहाय्य याबाबत या भेटीदरम्यान प्राथमिक चर्चा झाल्याची माहिती ठाणे स्मार्ट सिटी लिचे मुख्य कार्यकारी अधिकारी तथा ठाणे महानगरपालिकेचे अतिरिक्त आयुक्त संदीप माळवी यांनी दिली.
जपानी संस्थेच्या वतीने मुख्य प्रकल्प रचनाकार अया होंडा आणि भारतातील प्रतिनिधी वर्षा गुप्ता यांनी स्मार्ट सिटी प्रकल्पांबाबत मुख्य कार्यकारी अधिकारी संदीप माळवी यांच्याशी चर्चा केली. त्यावेळी, कार्यकारी अभियंता सुधीर गायकवाड, ठाणे स्मार्ट सिटी लि. चे क्षेत्राधारीत विकास प्रकल्प व पॅन सिटी प्रकल्पांचे
प्रकल्प व्यवस्थापन सल्लागार उपस्थित होते. ठाणे स्मार्ट सिटी लि. मार्फत राबविण्यात येणारे प्रकल्प वापरण्यात येणारे तंत्रज्ञान तसेच भविष्यात होणारे प्रकल्प, यात जपानमधील कंपन्या तांत्रिक बाबींवर कशाप्रकारे मदत करू शकतात यावर प्रामुख्याने चर्चा झाली.
केंद्र शासनाच्या स्मार्ट सिटी मिशन अंतर्गत ठाणे स्मार्ट सिटी लि. मार्फत ठाणे शहरात विविध प्रकल्प राबविण्यात येत आहेत. स्मार्ट सिटी मिशन अंतर्गत एकूण 35 प्रकल्पांपैकी 32 प्रकल्प पूर्ण झालेले असुन तीन महत्त्वाकांक्षी प्रकल्पांची कामे प्रगतीपथावर आहेत.
केंद्र शासनाचे गृहनिर्माण व शहरी व्यवहार मंत्रालयाचे स्मार्ट सिटी विभाग आणि जपान सरकार यांच्यात सन 2022 मध्ये सहकार्याचा करार करण्यात आलेला आहे. यानुसार देशातील स्मार्ट सिटी शहरांमध्ये शाश्वत शहरी विकासात सहकार्य पाठविणेसाठी विविध उप गट बनविण्यात आलेले आहेत. याच आधारावर दोन्ही देशांमधील सहकार्य वाढविण्यासाठी जपान इंडिया स्मार्ट सिटी कोऑपरेटीव्ह प्लॅटफॉर्म (JISCOP) तयार करण्यात येत आहे. त्याअनुषंगाने, सन 2024-25 मध्ये दोनदा जपान सरकारचे प्रतिनिधी तसेच संस्थेचे प्रतिनिधी यांच्यासह ऑनलाईन पध्दतीने संवाद झाला होता.
तसेच, नोव्हेंबर-2024 मध्ये जपान सरकारच्या पायाभूत सुविधा आणि पर्यटन विभागाच्या प्रतिनिधींनी ठाणे स्मार्ट सिटी लि च्या कार्यालयास भेट देऊन प्रकल्पांबाबत माहिती घेतली होती. याच उपक्रमातील पुढील बैठक शुक्रवारी पार पडली.
