प्रतिनिधी – मुंबईची लाईफ लाईन ओळखल्या जाणाऱ्या मध्य रेल्वे मार्गावरील ऐतिहासिक अशा असलेल्या ठाणे रेल्वे स्थानकात रेल्वे प्रवाशांचा वाढणारा अतिरिक्त भार व रेल्वे प्रवाशांना भेडसावणाऱ्या समस्या ठाणे लोकसभेचे खासदार राजन विचारे यांनी मध्य रेल्वे प्रबंधक रजनीश कुमार गोयल यांच्या दालनात आयोजित केलेल्या बैठकीत मांडल्या. त्यावेळी रेल्वे प्रशासन व महापालिका अधिकारी उपस्थित होते. त्याच समस्या घेऊन मध्य रेल्वे महाव्यवस्थापक अनिल कुमार लाहोटी यांचीही भेट घेऊन त्यांच्याही निदर्शनास आणून दिल्या.
ठाणे रेल्वे स्थानक हे मध्य रेल्वे मार्गावरील मुंबई नंतर रेल्वे प्रशासनाला जास्त उत्पन्न मिळवून देणारे स्थानक आहे. या रेल्वे स्थानकातून दररोज ६ ते ८ लाख प्रवासी ये -जा करीत आहेत.
नवी मुंबई येथे जाणारे प्रवासी सुद्धा ठाणे रेल्वे स्थानकात उतरून हार्बर मार्गावरील नवी मुंबईकडे जाणाऱ्या रेल्वेने प्रवास करीत आहेत. त्यामुळे ठाणे रेल्वे स्थानकात प्रवाशांची वाढणारी संख्या लक्षात घेता ठाणे – मुलुंड दरम्यान नवीन रेल्वे स्थानक व ऐरोली कळवा एलिव्हेटेड या प्रकल्पाची नितांत गरज असल्याचे सांगितले. त्यामुळे हे दोन्ही प्रकल्प जलद गतीने मार्गी लावण्यासाठी प्रशासनाला आदेश दिले आहेत.
सदर बैठकीत ठाणे रेल्वे स्थानकाच्या पश्चिमेस धोकादायक झालेली इमारत पाडण्यात आलेली आहे. त्या जागेवर नवीन इमारत उभी करण्यासाठी रेल्वे लाईन डेव्हलपमेंट (RLDA) या विभागामार्फत आराखडा बनविण्याचे काम सुरू आहे. खासदार राजन विचारे यांनी सुप्रसिद्ध वास्तु विषारद हितेन सेठी असोसिएट यांच्यामार्फत बनविलेल्या हेरिटेज लुक असलेल्या इमारतीचा आराखडा या बैठकीत सादर केला. लवकरच यास मान्यता मिळवून या इमारतीचे काम सुरु करू असे रेल्वे प्रशासनाने सांगितले.
*पादचारी पूल -*
ठाणे रेल्वे स्टेशन येथे सुरू असलेले कल्याण व मुंबई दिशेस पादचारी पुलाचे काम संतपणे सुरू असल्यामुळे फलाटावरील पत्रे काढल्यामुळे प्रवाशांना ऊन-पावसामुळे त्रास सहन करावा लागत आहे. हे काम युद्धपातळीवरती सुरू करून प्रवाशांना कोणत्याही प्रकारची गैरसोय होऊ नये यामुळे लवकरात लवकर पादचारी पुलाचे काम पूर्ण करण्यात यावे. तसेच या पुलाच्या उभारणीसाठी ठाणे महानगरपालिकेने रेल्वेला ८ कोटी वर्ग केलेले आहेत. उर्वरित रक्कम जमा करण्यासाठी खासदार राजन विचारे यांनी ठाणे महापालिका आयुक्त यांच्याशी चर्चा करून उर्वरित रक्कम रेल्वेकडे लवकरात लवकर जमा करण्याची विनंती करण्यात आली आहे.
*प्रवाशांची सुरक्षा*
ठाणे रेल्वे स्थानकावर ६ ते ८ लाख प्रवाशांच्या सुरक्षितेच्या दृष्टिकोनातून आर पी एफ सुरक्षारक्षक मनुष्यबळ ७० असल्याने खंत व्यक्ती केली असून सुरक्षारक्षक वाढविण्यात यावी. अशी विनंती खासदार राजन विचारे यांनी केली.तसेच ठाणे रेल्वे स्थानक परिसरात बसविण्यात आलेल्या सीसीटीव्हीची संख्या वाढविण्यात यावी. त्याचबरोबर प्रवाशांना सोयीस्कर पडेल या दृष्टिकोनातून तक्रार निवारण केंद्र उभे करावे जेणेकरून रेल्वे स्थानकात होणाऱ्या गुन्हेगारी प्रवृत्तीला आळा बसू शकेल.
रेल्वे परिसरातील फेरीवाल्यांवर नियंत्रण ठेवण्यासाठी २४ तास प्लॅटफॉर्म व पादचारी पुलावरती आरपीएफची सुरक्षा असणे अनिवार्य असल्याचे तसेच रेल्वे व महापालिका नोडल ऑफिसरची नेमणूक करा अशी विनंती रेल्वे सुरक्षा आयुक्त शुक्ला यांच्याकडे खासदार राजन विचारे यांनी केली.
*यु टी एस प्रणालीची जनजागृती (मोबाईल द्वारे तिकीट काढण्याची पद्धत)*
रेल्वे स्थानकात तिकीट खिडकी वरती पिकअवर्स मध्ये असणाऱ्या स्टाफची संख्या वाढविण्यात यावी किंवा रेल्वे प्रशासनाने अत्याधुनिक तंत्रज्ञानाद्वारे यु टी एस प्रणाली मार्फत तिकीट काढून घेण्याची सुविधा सुरू केली आहे. त्याचे एजन्सी मार्फत ठीक ठिकाणी जनजागृती कक्ष उभारून प्रवाशांना मोबाईल मार्फत तिकीट कसे काढता येईल यांचे मार्गदर्शन सोय उपलब्ध करून द्यावी त्यावर रेल्वेने सप्ताह सुरू करू असे आश्वासन खासदार राजन विचारे यांना दिले.
*रेल्वे बोर्डाकडे पाठपुरावा*
कोकणात जाणाऱ्या रेल्वे गाड्यांचे दर एक्सप्रेस रेल्वे गाड्यांच्या दराप्रमाणे लागू केल्यामुळे मेमू रेल्वे गाड्याने प्रवास करणाऱ्या प्रवाशांना वाढीव तिकिटाचा नाहक भार सहन करावा लागत आहे. यामुळे खासदार राजन विचारे यांनी मुंबई छत्रपती शिवाजी महाराज टर्मिनस येथे घेण्यात आलेल्या मध्य रेल्वे डीआरएम यांच्या सोबतच्या बैठकीत या विषयाला वाचा फोडून या संदर्भात रेल्वे बोर्डाकडे रेल्वे तिकीट दर कमी करण्याची मागणी केली.
*एल टी टी बनारस एक्स्प्रेस ला ठाणे स्थानकात थांबा देण्याची मागणी*
बनारस, जौनपुर, आजमगढ, येथे जाण्यासाठी १२१६७/१२१६८ एल टी टी बनारस एक्स्प्रेस या ट्रेन ला ठाणे स्थानकात येताना व जाताना ठाणे स्थानकात थांबा देण्याची मागणी खासदार राजन विचारे यांनी रेल्वे महाव्यवस्थापक यांच्याकडे केली आहे.
*शौचालयाची निर्मिती*
ठाणे रेल्वे स्थानक येथे भारतातील पहिले वातानुकूलित शौचालय बांधण्यात आले होते. ते शौचालय सुरू झाल्यापासून त्याची पाच वर्षाची निविदा संपेपर्यंत व्यवस्थित सुरळीत सुरू होते. निविदा संपल्यानंतर रेल्वेने वातानुकूलित शौचालय सुरू ठेवणे गरजेचे होते. परंतु त्याचे रूपांतर साध्या शौचालय मध्ये केले आहे ते शौचालय पुन्हा वातानुकूलित करून प्रवाशांना चांगली सुविधा देण्यात यावी अशी मागणी खासदार राजन विचारे यांनी बैठकीत केली. खासदार राजन विचारे यांच्या मागणी नुसार फलाट क्र. ७, ८ आणि ५, ६ मुंबई व कल्याण दिशेस दिव्यांग व महिलांसाठी नवीन स्वतंत्र शौचालयाची निर्मिती करण्यात आल्याचे रेल्वे प्रशासनाकडून सांगण्यात आले.
तसेच ठाणे स्थानकामध्ये काही वर्षांपूर्वी दोन लिफ्ट सुरू करण्यात आल्या होत्या लिफ्ट वारंवार बंद असल्यामुळे विशेष करून ज्येष्ठ नागरिक आणि गरोदर महिलांना त्रास सहन करावा लागत आहे. हे निदर्शनास आणून दिले. तसेच मुंबई व नवी मुंबईकडे जाणाऱ्या लोकलच्या फेऱ्यांमध्ये वाढ करण्याची मागणी व लोकल ला एसी चे २ किंवा ३ डब्बे जोडण्याची मागणी खासदार राजन विचारे यांनी केली आहे.
*चौकट*
*नवी मुंबईकरांसाठी दिघा रेल्वे स्थानक नवीन वर्षात सुरु होणार…..खासदार राजन विचारे*
कळवा एलिव्हेटेड या प्रकल्पातील दिघा स्थानकाचे काम पूर्णत्वास आलेले आहे. ३१ डिसेंबर पर्यंत काम पुर्ण करून देण्याचे आश्वासन रेल्वे प्रशासनाकडून देण्यात आलेले आहे. नवीन वर्षात दिघा रेल्वे स्थानक सुरू करा अशी मागणी खासदार राजन विचारे यांनी केली. नवी मुंबई रेल्वे स्थानकात रेल्वे प्रवाशांच्या सोयीसाठी सिडकोने विकसित केलेल्या सर्व रेल्वे स्थानकात सरकते जिने बसविण्यासाठी सिडको मार्फत निविदा प्रक्रिया सुरु आहे. लवकरच या सर्व रेल्वे स्थानकात सरकते जिने व लिफ्ट बसविण्याचे काम सुरु होणार आहे.
