ठाणे 7 – कोविड काळात ठाणे महानगर पालिका क्षेत्रातील रुग्णालयामध्ये मोठ्या प्रमाणात ऑक्सिजन आणि रेमडेसीव्हीर इंजेक्शनचा तुटवडा निर्माण झाला होता. त्यामुळे ठाणे शहरासह मुंब्य्रातील बिलाल, रेहमानीया, बुर्हानी, प्राईम या रुग्णालयांमध्ये काही कोरोनाबाधीतांना आपले प्राण गमवावे लागले होते. त्या निषेधार्थ आंदोलन करणारे तत्कालीन विरोधी पक्ष नेते शानू पठाण यांच्यावर दाखल असलेल्या गुन्ह्याप्रकरणी बुधवारी अटक करण्यात आली. दरम्यान, पठाण यांना पोलीस ठाण्यातच जामीन देऊन मुक्त करण्यात आले.
ठाणे शहरासह मुंब्रा, कळवा आदी भागात कोविड काळात आरोग्य विषयक साधनांची प्रचंड कमतरता निर्माण झाली होती. ठाणे महानगर पालिकेकडून रुग्णालयांत आवश्यक असणारी साधने पुरविण्यात वेळ जात जात होता. त्यातच मुंब्रा येथील बिलाल, रेहमानीया, बुर्हानी, प्राईम आदी रुग्णालयांमध्ये ऑक्सिजन सिलिंडर न पुरविण्यात आल्यामुळे काही रुग्णांचा मृत्यू झाला होता. त्यामुळे संतप्त झालेल्या शानू पठाण यांनी 20 एप्रिल 2021 रोजी रिकामा ऑक्सिजन सिलिंडर घेऊन ठामपा मुख्यालयात आंदोलन केले होते. तसेच, ठामपा मुख्यालयाच्या दारात ठिय्या आंदोलन केले होते. या प्रकरणी दाखल गुन्ह्यात पठाण बुधवारी अटक करण्यात आली.
दरम्यान, शानू पठाण यांच्यावरील कारवाईची माहिती मिळताच मुंब्रा येथून शेकडो कार्यकर्त्यांनी नौपाडा पोलीस ठाणे गाठले. त्यामुळे नौपाडा पोलीस ठाण्याबाहेर प्रचंड गर्दी झाली होती.