Saturday, January 23 2021 1:20 pm

कोकण रेल्वे ठप्प; युटीव्ही मशीन रेल्वे रुळांवरून घसरली

रत्नागिरी :- मंगळवारी सकाळी रत्नागिरीजवळ विद्युतीकरणासाठीचे मशीन रुळांवरून घसरल्यानं कोकण रेल्वेची वाहतूक ठप्प झाली असून मुंबईकडून आणि मुंबईच्या दिशेनं जाणाऱ्या रेल्वेगाड्यांचा खोळंबा झाला आहे. नेमके सुट्टीच्या दिवसात अशी समस्या झाल्यामुळे प्रवाशांना मोठ्या प्रमाणात त्रास सहन करावा लागत आहे.

रत्नागिरीतील भोके गावाजवळ आज सकाळी विद्युतीकरणासाठी वापरण्यात येणारे युटीव्ही मशीन रेल्वे रुळांवरून घसरले. त्यामुळे कोकण रेल्वेची वाहतूक ठप्प झाली. मुंबईहून कोकणात जाणाऱ्या, तसंच कोकणातून मुंबईत येणाऱ्या रेल्वे गाड्यांचा खोळंबा झाला. सुट्टीचा हंगाम सुरू असून, कोकणात मोठ्या संख्येनं जाणाऱ्या प्रवाशांचे प्रचंड हाल झाले. युटीव्ही मशीन रेल्वे रुळांवर आणण्याचे प्रयत्न सुरू आहेत. त्यानंतर कोकण रेल्वेवरील वाहतूक सुरळीत होईल, असं कोकण रेल्वेकडून सांगण्यात आलं आहे.