एक भारत, श्रेष्ठ भारत अंतर्गत ठाण्यात उत्तर प्रदेश दिन साजरा

ठाणे, २५ : पंतप्रधान नरेंद्र मोदी यांनी सुरू केलेल्या ‘एक भारत – श्रेष्ठ भारत’ कार्यक्रमांतर्गत भाजपा ठाणे शहर जिल्ह्याच्या वतीने उत्तर प्रदेश स्थापना दिन उत्साहात साजरा करण्यात आला. भाजपातर्फे ठाण्यात चारठिकाणी आयोजित केलेल्या कार्यक्रमांना उत्तर भारतीयांचा उत्स्फूर्त प्रतिसाद मिळाला. यानिमित्ताने उत्तर भारतीय मोर्चाचे प्रमुख शैलेश मिश्रा यांनी दिलेल्या रुग्णवाहिकेचेही अनावरण करण्यात आले.
भाजपाच्या राष्ट्रीय अभियानांतर्गत ठाण्यात पक्षाच्या वतीने भारतातील सर्व राज्यांचे स्थापना दिन साजरे करण्यात येत आहेत. त्यानुसार उत्तर प्रदेश दिन मंगळवारी सायंकाळी साजरा करण्यात आला. त्यानिमित्ताने उत्तर भारतीय बांधवांनी उत्साहात मिरवणूकही काढली होती. ठाणे शहर भाजपाचे अध्यक्ष व आमदार निरंजन डावखरे आणि आमदार संजय केळकर यांच्या मार्गदर्शनाखाली कार्यक्रम यशस्वीपणे पूर्ण झाले. या कार्यक्रमाला भाजपाच्या प्रदेश सरचिटणीस माधवी नाईक, माजी गटनेते मनोहर डुंबरे, माजी नगरसेविका कविता पाटील, कमल चौधरी, किरण मणेरा आदींची उपस्थिती होती.
भाजपाच्या पोखरण मंडलच्या वतीने माजी नगरसेवक शेरबहादूर सिंह, आशादेवी सिंह, मंडल अध्यक्ष संतोष जायसवाल यांच्या वतीने कवी संमेलन व गुणवंत नागरिकांचा सत्कार करण्यात आला. कवी सदाशिव चतुर्वेदी, नेहा मिश्रा, राजीव मिश्रा यांच्या कवितांचा आनंद नागरिकांनी लुटला.
घोडबंदर रोड मंडलाच्या वतीने रवी सिंह यांनी ब्रह्रांड येथील सम्मेलन बॅंक्वेट हॉलमध्ये भोजपुरी संगीताचा कार्यक्रम आयोजित केला होता. त्यात मान्यवरांचाही सत्कार करण्यात आला. इंदिरानगर मंडलाच्या वतीने माजी नगरसेविका केवलादेवी यादव व राजकुमार यादव यांनी वागळे इस्टेट येथील कर्मवीर रामनयन यादव मैदानात भव्य कार्यक्रम आयोजित केला होता. गायक सोनू सिंह, विनय पांडे, नंदिनी तिवारी यांच्या गीतांचा कार्यक्रम पार पडला.
दिवा येथे झालेल्या कार्यक्रमात भाजपाच्या उत्तर भारतीय मोर्चाचे प्रमुख शैलेश मिश्रा यांनी प्रदान केलेल्या रुग्णवाहिकेचे माजी राज्यमंत्री कृपाशंकर सिंह यांच्या हस्ते लोकार्पण करण्यात आले. या कार्यक्रमाचे आयोजन डॉ. विद्यासागर दुबे यांनी केले होते. भाजपाच्या ‘एक भारत – श्रेष्ठ भारत’चे संयोजक शहर संयोजक राजेश जाधव यांनी कार्यक्रमांचे नियोजन केले होते.